ඩෙංගු අවදානම හේතුවෙන් පාසල් සිසුන්ට නිල ඇඳුමට අමතර ආරක්ෂිත ඇඳුම් ඇඳීමට අවසර

ඩෙංගු මදුරු දෂ්ඨනයෙන් පාසල් සිසුන් ආරක්ෂා කිරීමේ අරමුණින්, නිල ඇඳුමට අමතරව අත් සහ පා ආවරණය වන පරිදි සුදුසු ඇඳුමකින් සැරසී පාසල් වෙත පැමිණීමට අවස්ථාව ලබාදීමට අධ්‍යාපන අමාත්‍යාංශය තීරණය කර තිබෙනවා.

ඒ බව සඳහන් කරමින් අධ්‍යාපන අමාත්‍යාංශය නිවේදනයක් නිකුත් කර ඇත.

අධ්‍යාපන අමාත්‍යාංශ ලේකම් නාලක කළුවැව මහතා සඳහන් කළේ, පාසල් සිසුන් අතර ඩෙංගු ව්‍යාප්තිය අවම කිරීමේ අරමුණින් මෙම තීරණය ගෙන ඇති බවයි.

ඒ අනුව සියලු පාසල්වල විදුහල්පතිවරුන් මේ සම්බන්ධයෙන් දැනුවත් කිරීමට පියවර ගෙන ඇති අතර, ඉදිරියේදී නිල උපදෙස් ද නිකුත් කිරීමට නියමිත බව ඔහු ප්‍රකාශ කළා.

එමෙන්ම, නිසි ප්‍රමිතියකින් යුත් මදුරු විකර්ශක භාවිත කිරීම පිළිබඳව ද සිසුන් දැනුවත් කරන ලෙස අදාළ නිවේදනය මගින් වැඩිදුරටත් උපදෙස් ලබාදී තිබෙනවා.