ගුවන්ගතවීමෙන් පසු අකුණු සැර වැදී ශ්‍රීලන්කන් යානයක් යළි ගොඩබස්වයි

කටුනායක ජාත්‍යන්තර ගුවන්තොටුපොළින් ඊයේ (11) රාත්‍රීයේ ඕස්ට්‍රේලියාවේ මෙල්බර්න් නුවර බලා ගමන් ආරම්භ කළ ගුවන් යානයක් හදිසියේ ගොඩබස්වා ඇති බව වාර්තා වනවා.

ශ්‍රී ලංකන් ගුවන් සමාගම පැවසුවේ අද (12) අලුයම 12.30ට ඕස්ට්‍රේලියාවේ මෙල්බර්න් නුවර බලා ගමන් ආරම්භ කළ ගුවන් යානයට මෙම අනතුර සිදුව ඇති බවයි.

UL 606 දරන ගුවන් යානයේ එක් එන්ජිමකට මෙම අකුණු සැර වැදීම සිදුව ඇති අතර ආරක්‍ෂිත පියවරක් ලෙස ගුවන් යානය නැවත කටුනායක ගුවන් තොටුපොළ වෙත ගොඩබෑමට කටයුතු කර ඇති බවයි වාර්තා වන්නේ.

කෙසේ වෙතත් පැය 5ක ගුවන් ප්‍රමාදයකින් අනතුරුව අදාළ මඟීන් පිරිස ඕස්ට්‍රේලියාවේ මෙල්බර්න් නුවර බලා පිටත් කර යවා තිබෙනවා.

ශ්‍රී ලංකන් ගුවන් සමාගම සඳහන් කළේ සිද්ධියෙන් කිසිඳු මඟියෙකුට ගෝ ගුවන් යානයකට හානියක් සිදුව නොමැති බවයි.